दक्षिण भारतात तीन हवामान प्रणाली सक्रिय, राज्यात थंडी कमी होऊन पावसासाठी अनुकूल वातावरण.
हवामान अभ्यासक मच्छिंद्र बांगर यांच्या ताज्या अंदाजानुसार, दक्षिण अंदमान समुद्र आणि अरबी समुद्रात एकाच वेळी कमी दाबाची क्षेत्रे सक्रिय झाल्याने महाराष्ट्रातील हवामानात मोठे बदल अपेक्षित आहेत. या प्रणालींमुळे राज्यातील अपेक्षित थंडीची लाट दूर गेली असून, त्याऐवजी ढगाळ वातावरणासह पावसासाठी अनुकूल परिस्थिती निर्माण होत आहे. विदर्भ वगळता राज्याच्या बहुतांश भागांत पावसाची शक्यता वर्तवण्यात आली आहे.
तीन प्रणाली सक्रिय, चक्रीवादळाची अनिश्चितता
सध्या दक्षिण अंदमान समुद्र, श्रीलंकेजवळ आणि दक्षिण अरबी समुद्रात कमी दाबाची क्षेत्रे सक्रिय झाली आहेत. या तिन्ही प्रणालींमुळे सध्या दक्षिण भारतात, विशेषतः केरळ, तामिळनाडू आणि आंध्र प्रदेशच्या किनारपट्टीवर पावसाळी वातावरण निर्माण झाले आहे. अनेक माध्यमांमध्ये चक्रीवादळाच्या बातम्या येत असल्या तरी, हवामान मॉडेलमध्ये त्याच्या निर्मिती, तीव्रता आणि दिशेबद्दल अजूनही मतमतांतरे असल्याचे बांगर यांनी स्पष्ट केले आहे. यापैकी कोणती प्रणाली अधिक ताकदवान बनते, यावरच हवामानाचे पुढील स्वरूप अवलंबून असेल.
