मालेगावजवळील डोंगराळे गावात एका साडेतीन वर्षाच्या चिमुकलीसोबत घडलेल्या अमानुष आणि पाशवी कृत्याने केवळ महाराष्ट्रच नव्हे, तर संपूर्ण देशातील माणुसकीला हादरवून सोडले आहे. १६ नोव्हेंबरला घडलेल्या या घटनेने गावकऱ्यांच्या मनावर खोलवर घाव घातले असून, या प्रकरणातील धक्कादायक दुसरी बाजू आता समोर येत आहे.
ज्याला माणुसकीने जपले, त्यानेच घात केला
या प्रकरणातील आरोपी विजय खैरनार हा रोजंदारीवर काम करणारा बांधकाम मजूर होता. त्याचे आई-वडील नसल्यामुळे तो एकटा राहायचा. धक्कादायक आणि अविश्वसनीय बाब म्हणजे, ज्या चिमुकलीसोबत हे क्रूर कृत्य घडले, त्याच चिमुकलीच्या कुटुंबाने माणुसकीच्या भावनेतून त्याला आधार दिला होता. हे कुटुंबीय त्याला नियमित जेवण देत असत आणि त्याची काळजी घेत असत. त्यामुळे आरोपीचे या कुटुंबाच्या घरी नियमित येणं-जाणं होते. घरातल्याच एका व्यक्तीने एवढे क्रूर कृत्य करावे, हे गावकऱ्यांसाठी अत्यंत अविश्वसनीय असून, माणुसकीवरील विश्वास उडवणारे आहे. सुरुवातीला काही किरकोळ वादामुळे सुडाच्या भावनेतून हे कृत्य घडल्याचे बोलले जात होते, पण चिमुकलीच्या आईने त्यांच्यात कोणतेही भांडण नसल्याचे स्पष्ट केले आहे.
गाव शोकसागरात बुडाले; महिलांमध्ये भीतीचे वातावरण
या घटनेमुळे डोंगराळे गाव पूर्णपणे शोकसागरात बुडाले आहे. गावकऱ्यांच्या मनावर इतका मोठा आघात झाला आहे की, घटनेनंतर अनेक घरांमध्ये तीन दिवस चूलही पेटली नाही, कारण लोकांना अन्न गोड लागेनासे झाले आहे. गावातील महिला आणि मुलींमध्ये प्रचंड भीतीचे वातावरण पसरले आहे.
या भीतीमुळे विद्यार्थी पटसंख्येवरही गंभीर परिणाम झाला आहे. शाळेत जाण्याची वेळ झाली की मुली आणि त्यांचे पालक घाबरून जात असल्याने गेल्या चार दिवसांपासून विद्यार्थी शाळेत गेलेले नाहीत.
सीसीटीव्ही कॅमेरा बंद, नसता चिमुकलीचा जीव वाचला
या घटनेबद्दल बोलताना गावकऱ्यांनी एक अत्यंत महत्त्वाची आणि खेदजनक बाब समोर आणली आहे. चिमुकली राहत असलेल्या गल्लीच्या चौकातील सीसीटीव्ही कॅमेरे काही दिवसांपासून बंद होते.
गावकऱ्यांनी तीव्र भावना व्यक्त करत म्हटले आहे की, “जर हे कॅमेरे सुरू असते, तर आरोपीला हे घृणास्पद कृत्य करण्याची हिंमत झाली नसती आणि चिमुकलीचा जीव वाचला असता.” बंद कॅमेऱ्यांच्या निष्काळजीपणामुळेच आरोपीला कायद्याचा धाक राहिला नाही, असे मत गावकरी व्यक्त करत आहेत.
पोलीस चौकीची मागणी आणि पालकमंत्र्यांची घोषणा
डोंगराळे हे गाव मालेगाव शहरापासून सुमारे ३० किलोमीटर अंतरावर आहे आणि या आसपासच्या परिसरात कोणतीही पोलीस चौकी नाही. यामुळे या भागात कायद्याचा वचक नसल्याचे दिसून येते, ज्यामुळे गुन्हेगारांची हिंमत वाढते. या भीतीदायक वातावरणामुळे, या भागामध्ये तात्काळ पोलीस चौकी उभारण्यात येणार असल्याची घोषणा पालकमंत्री गिरीश महाजन यांनी केली आहे.
१६ नोव्हेंबरला घडलेल्या या घटनेचे तीव्र पडसाद महाराष्ट्रभर उमटले आहेत. आरोपीला कोर्टात आणणार हे कळल्यावर कोर्टाबाहेर संतप्त आंदोलकांनी मोठी गर्दी केली होती, ज्यामुळे आरोपीला न्यायालयात आणलेही गेले नाही. महाराष्ट्रातील जनतेला या नराधमी कृत्याचा प्रचंड संताप असून, आरोपीला लवकरात लवकर कठोर शिक्षा व्हावी, अशी मागणी जोर धरत आहे.
