स्थानिक स्वराज्य संस्था निवडणुकीमुळे निर्माण झाला संभ्रम; महिनाअखेरीस पैसे जमा होण्याची शक्यता, शासनाकडून दिलासा.
लाडकी बहीण योजनेच्या नोव्हेंबर महिन्याच्या हप्त्याची राज्यातील लाखो महिला लाभार्थी आतुरतेने वाट पाहत आहेत. नोव्हेंबर महिना संपत आला तरीही हप्ता जमा न झाल्याने महिलांमध्ये चिंतेचे वातावरण आहे. त्यातच आता राज्यात स्थानिक स्वराज्य संस्थांच्या निवडणुका जाहीर झाल्याने आचारसंहिता लागू झाली आहे. त्यामुळे या काळात योजनेचे पैसे खात्यात जमा होणार की नाही, याबाबत मोठा संभ्रम निर्माण झाला आहे.
आचारसंहितेच्या काळात पैसे मिळणार?
साधारणपणे, आचारसंहितेच्या काळात मतदारांवर प्रभाव टाकणारी कोणतीही नवीन घोषणा किंवा निधी वाटप केले जात नाही. यामुळे लाडकी बहीण योजनेचा हप्ता रखडणार की काय, अशी भीती व्यक्त केली जात होती. मात्र, सूत्रांनी दिलेल्या प्राथमिक माहितीनुसार, ही योजना जुनी आणि निरंतर सुरू असल्याने तिच्या अंमलबजावणीवर आचारसंहितेचा परिणाम होणार नाही. त्यामुळे स्थानिक स्वराज्य संस्थांच्या निवडणुकीच्या काळातही महिलांना पैसे दिले जातील, असे संकेत मिळत आहेत, ज्यामुळे महिलांना मोठा दिलासा मिळाला आहे.
