नत्र, स्फुरद आणि पालाशची योग्य मात्रा दोन टप्प्यांत द्या; फुटवा वाढवण्यासाठी युरियासोबत झिंक सल्फेटचा वापर आवश्यक.
पिकाच्या गरजा आणि खत व्यवस्थापनाचे टप्पे
गहू पिकाच्या भरघोस वाढीसाठी आणि विक्रमी उत्पादनासाठी योग्य वेळी खत व्यवस्थापन करणे अत्यंत महत्त्वाचे आहे. गहू पिकाच्या वाढीसाठी नत्राची (युरिया) सर्वाधिक गरज असते, कारण ते पिकाच्या शाखीय वाढीस मदत करते. त्यानंतर फॉस्फरस (स्फुरद) आणि कमी प्रमाणात पोटॅश (पालाश) आवश्यक असते. या गरजेनुसार खतांची मात्रा दोन मुख्य टप्प्यांमध्ये देणे आवश्यक आहे: पेरणीच्या वेळी (Basal Dose) आणि त्यानंतर वाढीच्या टप्प्यात (Top Dressing).
पहिला टप्पा: पेरणीच्या वेळी (Basal Dose)
पेरणीच्या वेळी खते देणे अत्यंत महत्त्वाचे आहे, कारण ती पिकाला लवकर उपलब्ध होतात आणि मुळांची वाढ चांगली होते. पेरणीसाठी शेतकरी १०:२६:२६, १२:३२:१६, किंवा १५:१५:१५ (३-१५) यापैकी कोणतेही एक संयुक्त खत वापरू शकतात. या खताची एक बॅग प्रति एकर या प्रमाणात वापरणे आवश्यक आहे. फॉस्फरसची मात्रा वाढवण्यासाठी यासोबत टीएसपी (ट्रिपल सुपर फॉस्फेट) चा वापर करावा. चांगले उत्पादन घेण्यासाठी, पेरणीच्या वेळी प्रति एकर किमान १०० किलो खताची मात्रा देणे आवश्यक आहे. मात्र, जमिनीची सुपीकता खूप चांगली असल्यास किंवा शेणखताचा वापर केला असल्यास, ७० ते ७५ किलो मात्रा देखील पुरेशी ठरू शकते.
