संत्रा, मोसंबी आणि केळी उत्पादक ३,९१० शेतकऱ्यांना मोठा दिलासा; जिल्हाधिकाऱ्यांच्या पाठपुराव्यानंतर पीक विमा वितरणाचा मार्ग मोकळा.
थकीत पीक विम्याबद्दल दिलासादायक अपडेट
राज्यातील शेतकऱ्यांसाठी एक अत्यंत महत्त्वाची आणि दिलासादायक बातमी समोर आली आहे. आंबिया बहार २०२४ च्या फळपीक विम्याच्या संदर्भातील हा अपडेट असून, ज्या महसूल मंडळांमध्ये हा पीक विमा मंजूर झालेला आहे, अशा महसूल मंडळांतील पात्र लाभार्थ्यांच्या खात्यामध्ये पीक विम्याची रक्कम जमा होण्यास सुरुवात झाली आहे. राज्य शासनाने या आंबिया बहार २०२४ साठी जवळजवळ २०३ कोटी रुपयांचा हप्ता वितरित करायला मंजुरी दिली होती. मात्र, निधी वितरित झाल्यानंतरही अमरावती जिल्ह्यामध्ये या फळपीक विम्याचे वितरण झालेले नव्हते.
मंजुरीतील अडथळा दूर
अमरावतीमध्ये संत्रा, मोसंबी आणि केळीच्या पीक विम्यासाठी हवामानाचे जे काही धोके आहेत, त्या अंतर्गत पीक विमा कंपनीच्या माध्यमातून काही आक्षेप घेण्यात आले होते. यामुळे फळपीक विम्याचे वितरण थांबले होते. मात्र, अखेर जिल्हाधिकाऱ्यांच्या माध्यमातून केलेल्या पाठपुराव्यानंतर हा थकीत फळपीक विमा मंजूर करण्यात आला असून, त्याचे वितरण करण्यास मंजुरी मिळाली आहे. यामुळे अमरावती जिल्ह्यातील एकूण ३,९१० शेतकऱ्यांना या फळपीक विम्याचा थेट लाभ मिळणार आहे.
